LL-L "Resources" 2011.07.06 (01) [EN]

[Lowlands-L List]

====================================================
 L O W L A N D S - L - 06 July 2011 - Volume 01
lowlands.list at gmail.com - http://lowlands-l.net/
 Posting: lowlands-l at listserv.linguistlist.org
Archive: http://listserv.linguistlist.org/archives/lowlands-l.html
 Encoding: Unicode (UTF-08)
Language Codes: lowlands-l.net/codes.php
=====================================================

From: "Stellingwerfs Eigen" <info at stellingwerfs-eigen.nl>
Subject: LL-L "hujjen"

Beste Lowlanders,
De laeste daegen bin 'k as keuterboertien baandig in de weer west mit
hujmaeken. Lichtkaans ok wel aorig om op disse LL-Lieste es te heuren en te
kieken as zo'k wark mit al zien eigennaemen deur oons allemaole op dezelde
meniere begrepen wodt.

Oflopen zaoterdagmiddag he'k zoe'n twienenhalf bunder netuurgrös veur de
eerste mi'jd dit jaor. Vroeger wodde zoks deur een peerd veur een mesiene
mit een mi'jbalke daon. Vandaege-de-dag doe'we dat mit een mederne
cyclomi'jer an de trekker. Et is et beste om in de naomiddag te mi'jen want
eerder op de dag zit d'r neffens kenners nog tevule eiwit in 't grös. Oons
huj is veur de peerden en daor mag eins niet tevule eiwit in zitten. Veur
koenen komt et niet zo krek.

De aanderedaegs - zundag dus - he'k een peer ure an 't keren west. De
zwillen huj wo'n dan deur een zwadkeerder aachter de trekker over de kop
keerd zodat de onderkaante dan boven komt te liggen en et zwad wat beter
deurwi'jen kan. D'r ston een mooie zaachte noordoosten wiend. Et dreugde dan
ok ommeraek. Stief langs de kaanten rondom et laand mos ik et vanzels wat
mit de haand bi'jharken. Een mooi warkien veur de zundagmiddag.

Maendag he'k d'r nog es mit de trekker deurhenne west om et nog es weer omme
te keren en et al aorig dreuge grös weer wat losser te maeken. Vandaege
(deensdag) he'k et vot nao 't middagure mit een zweelmesiene aachter de
trekker in wiersen zweelt. Om goed drie ure kwam de pakkiesmaeker en die het
d'r twiehonderd en acht prachtig mooi wunnen huj van past. Een ure of wat
naotied kwam d'r een ni'jmoodse plestifiseerder die de pakkies automaoties
van de grond opnemt, d'r een protte gruun plestiek omhenne wikkelt en ze dan
weer valen lat. Laot de regen now mar kommen.

Ien zoe'n pakkien weegt deurmekeer zoe'n vuvendattig kilo. Vroeger wodde dat
mit pakkiestouw bi'j mekeer hullen. Vandaege-de-dag is dat touw ok al van
een soorte van plestiek. Dit plestiek touw is naoderhaand ofval. Dat oolde
touw daor maekte mien vader - en ik mos 'm dan helpen - mit touwdri'jen
opni'j weer touw van. Vaeke een veur- of aachterliende waor de wezeboom mit
vaastezet wodde op de hujwaegen. Hi'j maekte d'r ok wel koetouwen en
helsters van. Mar goed, zo as et mit meer dingen gaot, dat bestaot niet
meer.

Al mit al hewwe now roem zuven ton lekker huj liggen en hoeven oonze peerden
et kommende winterschoft gien honger te lieden. As de nood an de man komt
zo'k d'r lichtkaans zels nog wel van lusten.

Toch een hiel verschil mit vroeger daegen. Dan waj' veur zoe'n twienenhalf
bunder meer as een hiele dag an 't mi'jen mit de zende. As d'r regen driegde
mos et hiele spul vlogge in oppers zet wodden en de aanderedaegs weer uut
mekeer stri'jd wodden. As 't even tegenzat mos et alderdeegst een peer keer
in oppers en weer uut mekeer. D'r beston nog gien bujjeradar dat alles mos
op et eigen gevuul. Aj' gelok hadden, of was et toch vakmaanschop, dan koj'
nao daegen hiel hadde warken et huj binnenhaelen. Vandaege-de-dag is 't eins
mar een tik an 't oor.
 Mit een vrundelike groet uut een zunnig Stellingwarf,
Piet Bult

=========================================================
Send posting submissions to lowlands-l at listserv.linguistlist.org.
 Please display only the relevant parts of quotes in your replies.
Send commands (including "signoff lowlands-l") to
listserv at listserv.linguistlist.org or lowlands.list at gmail.com
http://linguistlist.org/subscribing/sub-lowlands-l.html .
http://www.facebook.com/?ref=logo#!/group.php?gid=118916521473498
 =========================================================
-------------- next part --------------
An HTML attachment was scrubbed...
URL: <http://listserv.linguistlist.org/pipermail/lowlands-l/attachments/20110706/51bd98f9/attachment.htm>