LL-L "Songs" 2008.01.01 (05) [LS]

[Lowlands-L List]

L O W L A N D S - L  -  01 January 2008 - Volume 05
Song Contest: lowlands-l.net/contest/ (- 31 Dec. 2007)
=========================================================================

From: M.-L. Lessing <marless at gmx.de>
Subject: LL-L "Songs" 2008.01.01 (04) [E]

Leve Reinhard,

och nee, harr ik ahnt, dat de Song contest so en Flop warrn wöör, denn harr
ik mi ehrder in't Tüüch leggt! Jüst heff ik de Hiobsbott leest. Un ik harr
dacht, ji versuupt in Songs. Dat kann so nich blieven! Foorts heff ik mi
hensett un wat dicht. Dat Eerst un Wichtigst is natüürlich, en Melodie to
hebben. De Melodie to düssen Song is -- na klaar -- "Little ole wine-drinker
me", as Dean Martin dat sungen hett. Nu köönt wi ja ut ünnerscheedlich
Grünnen nich Dean Martin persöönlich to kriegen, düssen Song to singen
(Grund 1: He is keen Lowlander!, Grund 2: He is dood), man tominnst so'n
schöne Stimm schull dat woll ween!!! :-) Un hier is de Song (fix
torechtmaakt, eerste Fassong! Verbetern willkamen!):


Little old Lowlander me

Ik steil mi na de faste Wand vun Regen,
denn de Wind steiht stief, vertruut sin ruge Stimm,
he singt vun Land un See, ik lehn mi gegen
un de Blick geiht wied un sied bet an de Kimm.

Un fraagt de Lü, „'keen is de Deern op de Diekkroon?
Mit de Gummistebeln meist bet över't Knie?
Is de narrsch? Hier gifft't doch nix to sehn as platte Gegend!"
Ik segg: Little old Lowlander me...

Dat Gröön geiht dör de Bööm un dör de Wischen
dör'n Eerdball meist, so deep is ja düt Gröön,
un senkt sik mal en Oozeaan dortwüschen –
düt Land geiht wieder güntsiet all de Seen.

Un fraagt de Lü, „'keen höllt dat ut, sowat Öödes?!
Hier is nix los as Ackerland un Köh!
Un meistto natt!  'keen steiht dor mang de Wicheln? Sühst dat?"
Ik segg: Little old Lowlander me...

Ik warr mi ok an't Wark maken un en tweten Song dichten, ik denk, ik bliff
bi Dean Martin un nehm dütmaal "Gentle on my mind", dat warrt beten
kumplizeerter, un villicht warrt dat nich glieks fertig, wieldat ik morgen
wedder na Hamborg mutt. Winnen will ik ok gor nix, man bloots de contest
schall nu nich ganz so nakelt gahn. Wi dröfft uns nich blameern. Vunwegen
"Frisia non cantat"! :-)

Hartlich Gröten

Marlou

----------

From: R. F. Hahn <sassisch at yahoo.com>
Subject: Songs

Wees' bedankt, leve Marlou!

Dat hett flutscht bi Di.

Wat schall ik daar nu mit doon? Schall ik Di 'n Kamer in de Galerie
trechtmaken? Wenn ja, kannst mi maal 'n Vörstellen tostüürn?

Grötens un Kumpelmenten,
Reinhard/Ron
-------------- next part --------------
An HTML attachment was scrubbed...
URL: <http://listserv.linguistlist.org/pipermail/lowlands-l/attachments/20080101/57cf159c/attachment.htm>