LL-L "History" 2011.04.22 (03) [NDS]

[Lowlands-L List]

===============================================
L O W L A N D S - L - 14 March 2011 - Volume 01
lowlands.list at gmail.com - http://lowlands-l.net/
Posting: lowlands-l at listserv.linguistlist.org
Archive: http://listserv.linguistlist.org/archives/lowlands-l.html
Encoding: Unicode (UTF-08)
Language Codes: lowlands-l.net/codes.php
===============================================

From: Hannelore Hinz <hannehinz at t-online.de> <hannehinz at t-online.de>
 Subject: LL-L  "Language history" 2011.04.20 (03) [EN]

Leiw' Lowlanners,

hier ein wohre Geschicht.

*Tau jung för lege Tiden*

*Verdüüstern*

1942, ümmer noch Krieg un länger de Winterabends. So Abend för Abend
klappten wi von buten de Finsterladen tau un schöwen noch dat Schott vör.
Tit tau'n Verdüüstern.
All lang' verbaden, wenn sick so'n Spierken Schin von de oll Funzel nah
buten verkrupen ded'.
Düüsternis müßt sin! De Unfründ süht all'ns.
Sei wiren all lang' gaude olle Frünn', de Bootsbuger Hugo H., väl näumten em
ok "Ulenhaker", un min Pläg'vadder Dischermeister Hermann W.. Beid' wahnten
in de Gräun'Strat von uns' Stadt, un so hadd' Ulenhaker von Hus drei bet nah
Hus nägen man blot 'n lütten Fründschaftsweg tau gahn.
Dägte gediegen Handwarkslüd', twei plattdüütsche Kierls mit Pli un Hoeg,
jedwerein up sin Oort, ut Brää' Sleiten, Eddelholt ein gaut Stück Makwark
tau saagen, hubeln, kliestern odder hamern.
De ein bugte lütte Schäpen, un de anner discherte jede Sort von
Möbelstücken. Bi all' de lege Tit wiren sei likers ümmer noch sinnig un
vergnäugt. De Arbeit mit dat Holt hadd' ehr Fründschaft gaut liemt. Bald gew
dat kein Holt nich. Allens würd' indeilt, ok Holt.
Nu kreg' de grote Politik beid' fat', un tau'n Glück blew' ehr Fründschaft
ok hier up Duer bestahn.
Ein trugte denn' annern, Maut steg up. Nu ünner vier Ogen larmten sei oewer
dat Dodscheiten in Russland.
Tau jeden Abend rullten sei de oll binah utdeinte Landkort utenein. Mit
Knöpnadels pikten sei de Scheid' af, jüst de Grenz, an de ok de Soehn von
denn' Sponriter för dat düütsche Vaderland up Posten stahn müßt.
Sei disketierten oewer de Welt, besnackten dat "Wenn un Aber", sei kregen de
grote Politik bannig bi de Uhren un sei schimpten oewer denn' Unklauk von
dissen Krieg mit denn' Nazi-Verbräker Adolf.
Verstäkt hürten sei an'n Kloenkasten dat Vermellen ut London af. Diss' Oort
"Apporten" wiren bät up denn' Dod verbaden; sei dörften sick nich bi de
Bücks krigen laten. Sei horkten un verfierten sick, wenn  vör de Dör odder
achter de Finsterladen wat roeterte un kloeterte.

*De grote Bang' von buten wir ümmer üm un bi.
Wi wiren all lang' dor achter kamen, dat männigein ok för dat Luuschen lawt
würd'.

*As Kind kem mi dat all' unvermaudens tau Uhrn, woans sick de
beiden"Politiker"  bös makten. Buten wir't kolt un in disse lege Tit langten
de Kahlen för all' Lüd' man blot för ein warm Stuw.
Bi de Sak "Krieg" würd' blot noch flustert; "dat möt wat tau bedüden hebben"
säd ick mi, un so nah un nah grep mi dat Grugen ok an.
So leeg wir nu all de Tid, dat de Minsch in sin eigen Wahnstuw de Wohrheit
mit vörhollen Hand verdüüstern müßt.
*                                             Noch ein Verdüüstern.*

De Handwarkslüd' larmten sick mit ehr Weltgeschicht ümmer mihr in Raasch',
ofteins kummandierte ehr de Fliegeralarm in denn' Keller. Min Pläg'mudding
so middenmank. För ein Buddel Melk un bäten Kuurn för uns' Häuhner knütt'te
sei ut taustäkte Schapswull warme Strümp för de Sippschaft up'n Lann'.
Bi Klock nägen rüm plinkögte sei mi ümmer tau Bedd'; ick horkte nu wirer in
min' Kahn.

An tidigen Morken kek min Mudding mi deip in de Ogen un güng mit mi tau
Kihr. Gläuhnig rod ehr Gesicht, un mi dücht, as wullten ehr Ogen bi all' dat
grote Uprägen ut denn' Kopp rutscheiten.
Sei hamerte un räd'te ümmer wedder up mi in,  dat  *n i e n i c h  un   k e
i n e i n   *wat oewer denn' Abend  tau Uhren krigen dörf; un ok nicks de
best Fründin vertellen, - - - *süs warden wi all' afhalt -  - -!
*De grugelige Bang' in Mudder ehr Ogen seih ick noch hüt. ... süs warden wi
all' afhalt!"
*Dat sät för ümmer!*
Wüßt min Mudding dunnmals von all' dat unschüllig Minschenstarben...?

Ja,  leiw Lowlanners, ick wullt mit diss Geschicht mal de Stimmung von
Minschen vertellen, de  gegen de Nazi-Mitlöper wieren.

Oewer nu ierst mal frohe Paaschen (Ostern).

Hanne

===================================================
Send posting submissions to lowlands-l at listserv.linguistlist.org.
Please display only the relevant parts of quotes in your replies.
Send commands (including "signoff lowlands-l") to
listserv at listserv.linguistlist.org or lowlands.list at gmail.com
http://linguistlist.org/subscribing/sub-lowlands-l.html.
===================================================
-------------- next part --------------
An HTML attachment was scrubbed...
URL: <http://listserv.linguistlist.org/pipermail/lowlands-l/attachments/20110422/c49eddf1/attachment.htm>