LL-L "History" 2009.01.27 (03) [LS]

[Lowlands-L List]

===========================================
L O W L A N D S - L - 27 January 2009 - Volume 03
-------------------------------------------------------------------------
Please set the encoding mode to Unicode (UTF-8).
If viewing this in a web browser, please click on
the html toggle at the bottom of the archived page
and switch your browser's character encoding to Unicode.
===========================================


From: "Hannelore Hinz" <hannehinz at t-online.de>

Subject: Iesern Vörhang


Marlou schrew "I think Hanne could tell us a lot about this", un ick künn
väl vermelln, un *arg*  wüür sick dat anhürn. - Väl Minschen maken sick
ümmer noch so ehr Gedanken oewer ehr Landslüüd achter denn' iesern
Vörhang... Wat wist denn hürn... Ick mag gor nich giern ut disse Tied
vertelln. Sei hett bi männig Minschen deipe Noren (Narben) in Hart un Seel
laten, ok bi mi.

Stellt jug mal vör, man spunnt 'n unschülligen iehrlichen Minschen in ein
Kist un up sien Raupen "tau Hülp, tau Hülp", hürn de Verbräker nienich hen,
un de helpen willn, kriegen dat mit de Bang, ok inbucht tau warden. Utholln
hett't heiten. Utholln!!!  Ümmer wedder utholln mit ein up Duer Trüggstahn.
- Vunwägen Bananen un Schockelor wull ick nich utkniepen...ut anner Grünn'.
Mien ierst' Versäuk hett nich klappt, dat wier so wat as ein Fehlschuß.
Dat's ein Geschicht för sick. -

Wat mi hier so fastholln hett, is mien schöne Heimat, mien Mudderspraak,
mien Paddelboot. - Ick harr dunnmals nicks mihr tau verlieren un künn ein
Lipp riskieren (Kritik). Stünn je mudder-seelen-allein in de Welt. - Gewisse
Lüüd hebben mi nahspioneert, dat kreeg man mit de Tied mit, un de harden so
ehr eegen Teiken. -

Mi hebben's eins mit List un Tück in ein Sling' lockt (un de Scheff hett
nahhulpen, de Swienhund). Mit eigen Kraasch künn ick kontra gäben un mi tau
Wehr setten. Fraag nich, woans mi nahstens üm't Hart wier. - Allns müßt'n
mit sick allein afmaken. Stillswiegen un sick allein in sien Kamer utweinen.
Nicks denn' besten Fründ jichtenswat anvertrugen. Oewer Heinrich L. (all
lang' in de Wohrheit gahn) heff ick mi anvertruugt. Hei hett mi as 'n leiwen
Vadder de besten Ratsläg gäben. Ick dank em dat hüt noch. - Ick wier väl
krank, na, so mit de Nerven, as man seggt; heff väl väl weinen müßt', wat mi
männigmal nahlöppt, wenn ein an de Noren tuckt. - Sei leten mi in Rauh un
sleken mi nu heimlich un tücksch nah. - Nütt't allns nicks. Ick müßt' mi in
mien Schicksal gäben, dat gäw keinen annern Weg dunnmals un in Bautzen wull
ick nich inbucht warden. Wenn't gor nich anners güng, schummelte ick mit
Leiwskummer..., un einmal wier't wohr. - In'n Beraup hebben's mi hen- un
herschaben, denn mien Arbeit wier bestens.  Mudder Natur schenkte mi dat
Talent, anner up de Näs' tau spälen, hm, dat wier mien Taktik. -

As echten Kräwt-Minschen heff ick mi in mien Kräwthuus verkrapen un hier
mien Fantasie utläwt, Dichtels schräben, musiziert usw.. -

Jaa, dat gäw liekers ok Freud in mien Läben. Mien Optimismus stünn ümmer
wedder up. - Man, ümtau de iesern Vörhang.

As de Muer in de Binsen güng, dor wier't, as wenn von mi duusend iesern
Käden fallen, duusend un oewerduusend, o Mann, o Mann!

Dit Gefäuhl kann ick gor nich verkloren. Ick seet vör dat Kiekschapp un de
Tranen löpen un taugliek de Gedichten so ut mi rut, künn gor nich so rasch
schriewen, dat wier sowat as ein "Utbläuden", oewer ein *Erlösen.*

Nu künn ick wedder vörwarts gahn.



*1 9 . . *



Sei sünd wedderkamen,

ditmal drei Mannslüd' ... -



De Leddermantel ehr Teiken,

ehr Sprak ein Iesbarg,

ehr Hart ein Moehlenstein.

Ehr Drammeln, Aporten spioneeren.



Ehr grotmuult Räden, Geld inne Tasch, -

ok de wiede Welt.

FRIEHEIT - - - ? ? ?



Ein JA ut Bang, nich uttaudenken ...

Ein NEE, oewerall ein Schott.

Möötst ümmer stillswiegen.



Ein Muer snert dat Hart.

Nienich lütt Frieheit.

Verlaten Läben . . .



LIEKERS, - ick heff *NEE *bölkt.

*NEE, **NEE, **NEE !!!*



Dackkamer blew Hüsung.

Mien reiden West,

un liekers Tranen,-

wohen, wolang' noch. . .



*1989*



*Frieheit ümarmt mi*



Hannelore Hinz

27.01.2009 2. Fassung

Sonderdruck aus:

Klaus-Groth-Gesellschaft,

Jahresgabe 43, 2001

(1. Fassung)



Gräutens.



Hanne

•

==============================END===================================

 * Please submit postings to lowlands-l at listserv.linguistlist.org.

 * Postings will be displayed unedited in digest form.

 * Please display only the relevant parts of quotes in your replies.

 * Commands for automated functions (including "signoff lowlands-l")

   are to be sent to listserv at listserv.linguistlist.org or at

   http://linguistlist.org/subscribing/sub-lowlands-l.html.

*********************************************************************
-------------- next part --------------
An HTML attachment was scrubbed...
URL: <http://listserv.linguistlist.org/pipermail/lowlands-l/attachments/20090127/806a8d16/attachment.htm>