LL-L "Events" 2011.10.21 (01) [NDS]

[Lowlands-L]

=====================================================
  L O W L A N D S - L - 21 October 2011 - Volume 01
lowlands.list at gmail.com - http://lowlands-l.net/
Posting: lowlands-l at listserv.linguistlist.org
Archive: http://listserv.linguistlist.org/archives/lowlands-l.html
Encoding: Unicode (UTF-08)
Language Codes: lowlands-l.net/codes.php
=====================================================


From: "Stellingwerfs Eigen" <info at stellingwerfs-eigen.nl><hannehinz at t-online.de>
Subject: LL-L "Events"

Beste LL-Listeners,
Nao onderstaond verhaeltien wa'k - zonder internetmeugelikheden - in mien *
zwarfauto* ok nog een weke deur Frankriek reisd. Vandaege krek weer op 't
honk. Vandaor mien wat laete story over de...

Prissentaosie van et Woordeboek *Nederlaands - Oostends*, *deur Roland
Desnerck, op donderdag 13 oktober 2011*

Et leek aovens rond zeuvenen wel uutbetaelersure van de bi'jstaand in 't
gemientehuus - *of is et toch et Stadhuus?* - van Oostende. Zwat van 't volk
en zo te zien - mar daor moej' altied vreselik mit uutkieken - deurenneer
gien al te hoog geletterden die belangstelling hebben zollen veur et ni'je
Woordeboek van Oostende, zo leek et me teminste toe. Et maegien an de
infobalie van et gemientehuus van Oostende gaf me al wat geliek want ik mos
hier niet bi'j ansluten mar deurlopen en an et aende van de lange gaank
links of in de *Konfereensiezael* wezen. Tjonge, jonge, de Konfereensiezael,
nog wel. Et welkom was - krek as de veurige keer da'k op de prissentaosie
van zien veurige Woordeboek was - alderhattelikst. Deur kammeraod Roland
wodde ik vot-en-daodelik as *'eregaaste'* benuumd en moch krek as vuuf jaor
leden op de veurste riegel een stoel uutzuken waor een briefien miet *
'Voorbehouden'* op lag. De blispoters wodden naotied iene veur iene an me
veursteld - of was 't aandersomme - en daor zat ik dan as eregaaste tussen
de schepenen, kultuur-direkteuren en tael-perfesters.

Nao een stief kertiertien bleek de zael niet een klein betien te klein, nee,
de Konfereensiezael was vusen te klein! Mar, iene van de - naor mien idenen
hiele protte - mooie eigenschoppen van Belgen is, dat ze veur alle perblemen
een - en vaeks ok nog onverwaachse - oplossing hebben. Wat doej' aj'
ankommen zien dat de zael te klein is en d'r vusen te min stoelen - en dus
meensken - in kunnen? Dan hael ie de helte van de stoelen d'r uut. Zo kun
d'r - weliswaor staonde - vule meer meensken in zoe'n eins té kleine zael.
Nao de eerste honderd wa'k de tel zuver al kwiet mar et zullen wel zoe'n
vier- of vuufhonderd meensken west hebben. Leefde et Stellingwarfs - en in
die saemhorighied - mar op zoe'n meniere as daor in Oostende (B)...

De direkteur van kultuur-, biebeltheek- en archiefzaeken, mevrouw Martine
Meire,  hiette alleman hattelik welkom. Even laeter wodde de
*'feestrede'*uutspreuken deur mevrouw de schepen (wethoolder) Nancy
Bourgoignie. Dat kon
allemaole even bezakken onder de plezierige klaanken van et (gelegenhieds?)
trio *'Koezelamoeze'*. De gelegenhiedstoespraoke wodde hullen deur mien
buurman veur die aovend, dr. Hugo Ryckeboer, oold-redakteur van et
Woordeboek van de Vlaamse dialekten. En weer was d'r een historisch mar
veural ok fleurig stokkien meziek van et trio.

Et daankwoord deurregen mit alderhaande woordgrappies was van de meester,
Roland Desnerck, zels. Ik geleuf dat hi'j mi'j persoonlik - krek as vuuf
jaor leden - wel driekeer daankzegd het veur mien komst, ok mit mooie
woorden over et Stellingwarfs en Fries. (Roland komt zo now en dan wel es in
Frieslaand.) Nao nog een fleurig nummertien meziek wodden we uutneudigd veur
de receptie, wi'j zollen zeggen *'de naozit'*, mar dan hielemaole zonder
stoelen. Ik geleuf da'k wel mit een man (en vrouw) of tiene staon hebbe te
praoten over tael en schrieveri'je en hoe we et (tij) nog keren kunnen dat
et zo hadde aachteruut lopt mit dialekten en streektaelen. Want dat is daor
bi'j oonze zuderburen niet aanders as bi'j oons in de Stellingwarven en rond
om oons henne.

Mit een opdracht en een mooie haandtekening in et dikke boek bin 'k weer op
mien zwarfauto an toogd en mos bi'j et locht van een keersien vanzels vot
even in dat prachtige boek kieken. Et veurwoord is van mw. dr. Magda Devos.
Mit disse humorvolle vrouw bin 'k hier vuuf jaor leden in de kunde kommen en
hebben naotied nog wel es aemeld. Stel ie geven je vrouw een aaigien mit de
vinger onder de kinne; in et Oostends geef ie heur dan een *kinnezoptsje*.
Een klein baortien is een *barredtsje* en in een kefé zitten is *in de
stammenees zitn*. Krek as bi'j oons bin d'r veur een woord as praoten wel
een halve bladziede an meugelikheden, al naor gelang.

As 't zoe'n hiele reize now eins wel weerd was, woj' nog weten? Now, et was
de reize meer as weerd. De ontvangst, de entourage, de ni'je kunde diej'
weer opdaon hebben. En lao'we eerlik wezen, 't is ok wel een betien appat.
En van die doe-mar-gewonen hewwe in de Stellingwarven en rond om oons toe
meer as genoeg, en dan ok nog in beide betekenissen van et woord!

 Al mit al het Roland onderdehaand al meer as vuuftien titels op zien naeme.
Beste Roland: wat et volgende projekt ok wezen mag, aj' weer een *
'veurstelling'* hebben, lao'k me graeg weer uutneudigen.

Mit een vrundelike groet uut Stellingwarf,
Piet Bult


=========================================================
Send posting submissions to lowlands-l at listserv.linguistlist.org.
Please display only the relevant parts of quotes in your replies.
Send commands (including "signoff lowlands-l") to
listserv at listserv.linguistlist.org or lowlands.list at gmail.com
http://linguistlist.org/subscribing/sub-lowlands-l.html .
http://www.facebook.com/?ref=logo#!/group.php?gid=118916521473498
==========================================================
-------------- next part --------------
An HTML attachment was scrubbed...
URL: <http://listserv.linguistlist.org/pipermail/lowlands-l/attachments/20111021/4d3e3f49/attachment.htm>