Stun ya chaku tl'EX khapa qusaX.

[David Robertson]

Qhata mayka?

(Na khapIt kEmtEks pus "tl'EX" dreht tEnEs-wawa pus "whim".  Ma kEmtEks?)

Associated Press ya wawa ukuk san, Grand Ronde TIlIXEm lhas tIki pus
BastEn IlI7i tayi-tIlIXEm lhas palach k'IlEpay ixt hayash stun, anqEti ya
chaku tl'EX khapa qusaX.

AnqEti cilcil yaka.

Ukuk stun thIl khapa taLEm pi taXEm "tons".

Manak'i hayash ukuk khapa kanawi Xluwima stun tIlIXEm tl'ap lhaska khapa
nEsayka IlI7i qhanchi lhaska chaku khapa qusaX.

Alta ukuk cilcil-stun mIlhayt khapa American Museum of Natural History
haws, khapa New York tawn.

Lhaska makuk yaka wik-saya t'EkEmunak khul anqEti khapa ixt Portland
chIkEmIn-Iktas makuk haws.

Ixt BastEn "la" alta ya wawa lhush pus Shawash tIlIXEm lhEs tl'ap k'IlEpay
lhaska dreht anqEti t'EmanwEs Iktas ... Pi alta kakwa, Confederated Tribes
of Grand Ronde tIlIXEm lhas wawa lhas tIki ukuk stun, q'iwa dreht hayash
t'EmanwEs Ikta ukuk pus lhaska.

Shawash dakta pi t'EmanwEs man anqEti kwanIsEm chaku pus IskEm snas cEq ya
mIlhayt khapa lhxwap khapa ukuk hayash stun.  Ukuk cEq hehlp lhaska
munk-lhush hayu sIk tIlIXEm khap Willamette IlI7i

Hayu man lhas tIki tl'ap mawIch, mulak, pi icXwEt, lhas lhatEwa khapa ukuk
cilcil-stun pus munk mIlhayt lhas kElaytEn khapa ukuk snas cEq.

Hayu tEnEs man pi tEnEs lhuchmEn lhas chaku pus nanIch ukuk stun qhanchi
lhaska tlay tl'ap lhaska t'EmanwEs.

"Dreht hayash t'EmanwEs Ikta ukuk pus nEsayka," ya wawa June Olson, Grand
Ronde tIlIXEm lhaska tayi pus anqEti Iktas.  "Kakwa t'EmanwEs-k'aw yaka,
ya k'aw nEsayka khapa nEsayka dreht anqEti tIlIXEm.  Pi kanawi nEsayka
tIki tl'ap k'aw kakwa ukuk; alta-alta wek dreht hayu lhaska."

Khapa 1902 khul ixt anqEti "miner" Ellis G. Hughes ya tl'ap ukuk
cilcil-stun, khapa tEnEs lEmEtey wik-saya khapa West Linn, Oregon.  (Qha
Grapevine pi Sweetbriar wiXEt lhaska chaku kanamakwst.)  Hughes lulu stun
khapa ya haws, pi ya iskEm ixt khwata pus lhaksta tIki nanIch ukuk.

[Lhaksta tIki munk ukuk khapa BastEn?  :-)]
Dave




 *VISIT the archives of the CHINOOK jargon and the SALISHAN &
neighboring*
 		    <=== languages lists, on the Web! ===>
 	   http://listserv.linguistlist.org/archives/salishan.html
 	   http://listserv.linguistlist.org/archives/chinook.html