LL-L "Language maintanance" 2007.04.19 (04) [LS]

[Lowlands-L List]

L O W L A N D S - L  -  19 April 2007 - Volume 04

=========================================================================

From: "list at marcusbuck.org" <list at marcusbuck.org>
Subject: Language maintenance

Moin,
ik heff hüüt en intressanten Text funnen, de en Översicht gifft över
de Ümstänn, worüm dat Plattdüütsche hüüt nich mehr so good dorsteiht:
<http://www.kirchner-raddestorf.de/heimat/regional/sitten.htm>. Stammt
ut en Book to de Landskunn Neddersassen. För Lüüd, de sik för de
Historie vun de Spraak intresseert, op jeden Fall en wunnerbore
Översicht. Reformatschoon un dat Enn vun de Hanse, Urbanisierung, de
Krieg mit de Verdrevenen, dat de Dialekten in'n Oosten ganz weg weren
un wenn se na'n Westen kemen, de Dialekten dor gliek ok noch
bedrohden, vun wegen dat de frömmen Lüüd de Inheemschen nödigen
Hoochdüütsch to snacken. Un denn de Kiekschapp.

De Kiekschapp, dat is en ganz wichtigen Punkt, dat is mi ok för en
ganze Tiet al kloor worrn. Ik harr mi wunnert, dat jümmer mehr junge
Lüüd (jünger as dörtig) "Samstag" seggt (op Hoochdüütsch, kloor, op
Platt blifft dat Sünnavend). De öllern Lüüd seggt aver all
"Sonnabend", dor köönt de Jungen dat nich herhebben. Ok in'e Zeitung
bruukt se Sonnabend (tominnst Bild un de Regionalbläder). De Samstag
kann blot ut dat överregionale Feernsehn kamen. Un wenn een sik dat
bedinkt: kloor, na de Statistik kiekt de Lüüd jeden Dag twee, dree
Stünnen Feernsehn. Dat präägt. 'Keen snackt al jeden Dag dree Stünnen
mit de Öllern oder mit de Navers? Nich veel Lüüd. Dat Feernsehn präägt
de Spraak mehr as de egenen Öllern. Un wenn dat so is: Wie schall dor
Plattdüütsch bestahn blieven? Kummt ja meist nich vör in Feernsehn.
Nich mal bi'n NDR. Dor is ok blot een, twee Maal in'e Week Platt to
sehn, un denn ok blot mit halven Harten. Bruukt de Spraak en
plattdüütschen Feernseh-Senner? De den ganzen Dag blot Plattdüütsch
bringt? Schall dat woll wat helpen? Oder is doch al allens to laat,
wenn de Samstag al anbraken is? ;-)

Marcus Buck
-------------- next part --------------
An HTML attachment was scrubbed...
URL: <http://listserv.linguistlist.org/pipermail/lowlands-l/attachments/20070419/0b7ddd3d/attachment.htm>