LL-L "Tradition" 2009.12.24 (02) [NDS]

[Lowlands-L List]

===========================================
L O W L A N D S - L - 24 December 2009 - Volume 02
lowlands.list at gmail.com - http://lowlands-l.net/
Encoding: Unicode (UTF-08)
Language Codes: lowlands-l.net/codes.php
===========================================

From: victorie.a <victorie.a at home.nl>
Subject: Karstfeest

Moi lèeglaanders

Vanuut ’t Ogeveine een gezegend karstfeest.

Hieronder een karstverhaal uut vrogger tieden

Arend Victorie

’t Ogeveine

Drenthe

Nederlaand.

De vèurspelling in de karstnacht.

Op midder-karstnacht wörde der verteld dat de dieren kunt praoten.

Juust as de klokke twaalf ure zal slaon verteld zij menaar vrumde dinger.

Mienigiene, wel neisgierig was, perbèerde in die nacht te vernèmen wat ’t
vee onder menaar te vertellen had. En mienigien hèurde dan dinger die hij ’t
liefste nooit ehèur hadde.

Zo was der ok ies een boer die in de karstnacht naor zien stal gung umme
zien vee an te hèuren. Hij gung hiel veurzichtig de stal in, verschuulde
zich in een nis en wachte töt de klokke middernacht anwèes. Zien jaank umme
te weten war der komend jaor gebeuren zal, was zo groot, dat hij de
verzuuking niet had kunnen weerstaon en een plekkie  vlakbij koe en peerd
zöcht, umme ’t gesprek of te luustern. Stief van de zenings wachte hij of.
En töt zien verbaozing klunk daor iniens de stemme van zien peerd in de
stille en bedomte stal. “Der is sinds veurig karstmis alweer een jaor
veubij”. Heurde hij zien peerd zeggen. “Ja”, zee de koe, “t Was een good
jaor, ’t komend jaor liekt niet zo best.” “Nee,’t benauwt mij arg” en ’t
peerd zuchte, “t benauwt mij arg”. “Mij ok”, was ’t weerwoord van de koe,
“mar veur oe is ’t veul arger”.  “Och”, zee ’t peerd, “de boer was altied zo
goed veur mij en dan te bedeinken, dat ik hum zölf mut wegbrengen”. “Dat is
ok arg en ie ontkoomt der niet an”, zee de koe. “Nee”, zuchte ’t peerd,
“daor ontkoom ik niet an. Mar ’t is nog gien mei”. De karkklokke had zien
twaalf slagen edaone en koe en peerd stunden weer net zo onneuzel te kieken
as toen de boer stiekem de stal was binnen-ekomen…’t Ende van zien leven…..
Lag dat niet verbörgen in de weinige woorden deur de beide dieren ewisseld?
Hij gung langzem deur de schuure en zöcht zien beddestèe weer op umme te
gaon slaopen. Mar hoe hij ok keerde en wende, hij kun de slaop niet te
pakken kriegen. Zien vrouwe begreep der niks van en vreug hum naor de reden
van zien onröst. Nörs gaf hij te kennen dat zij stille mus weden. De dagen
gungen traog veurbij en de boer zun op een meniere umme an ‘t noodlot dat
hij veur zuch zag, te ontkomen. Hij besleut ten ende raod zien peerd, wel
hum altied goed ediend had, te verkopen, umme teminste een diel van zien
onröst kwiet te raken. ’t Peerd verkocht hij an een boer, die een hiel ende
varder weg woonde, zodat der gien kaans zul weden, dat ’t hum naor zien
groeve kun brengen. Hij kochte een aander peerd weer, mar hij miste zien
olde peerd bij al ‘t wark. Zien naober wörde ziek en kwam te verstarven en
zien boerderije wörde an een aander verhuurd. Die aander was de boer an wie
hij zien peerd har verkocht!... Toen mei in ’t laand kwam, trök de neie
huurder in de naoburige woning. Daordeur aovervöl de boer een grote aangst
en hij duurde zien huus niet uut, umdat hij bange was een ongelok te kriegen
en te starven. Waor hij buutenshuus bange veur was dat aoverkwaamp hum in
zien eigen huus. Hij vol deur ‘t  balkenslob, toen hij heui naor beneden
gooide en brak zien nekke. En zien eigen peerd, now van zien  naober, trök
de wagen, waormit hij naor zien groeve ebracht wörde…

Bron Dreinse Volksoaverleverings J. H. Bermans-Beins 1933

•

==============================END===================================

 * Please submit postings to lowlands-l at listserv.linguistlist.org.

 * Postings will be displayed unedited in digest form.

 * Please display only the relevant parts of quotes in your replies.

 * Commands for automated functions (including "signoff lowlands-l")

   are to be sent to listserv at listserv.linguistlist.org or at

   http://linguistlist.org/subscribing/sub-lowlands-l.html.

*********************************************************************
-------------- next part --------------
An HTML attachment was scrubbed...
URL: <http://listserv.linguistlist.org/pipermail/lowlands-l/attachments/20091224/8ebf3247/attachment.htm>