LL-L "Language politics" 2007.10.02 (02) [LS]

[Lowlands-L List]

L O W L A N D S - L  -  01 October 2007 - Volume 02
Song Contest: lowlands-l.net/contest/ (- 31 Dec. 2007)
=========================================================================

From: Marcus Buck <list at marcusbuck.org>
Subject: Language politics

So, leve Lüüd,
wenn wi uns denn würklich in Kiel un Hannover an'n Landdag keden wüllt ;-),
denn bruukt wi ja en Grund. Wi köönt ja nich eenfach opmarscheren un
"Plattdüütsch leevt!" un "Plattdüütsch mutt bestahn blieven!" ropen un wenn
denn en Journalist, de neeschierig worrn is, mit en Mikrofon an di ran
kummt, wat wi denn egentlich konkret wüllt, denn seggen: "Äh, ja, hm... Wi
hebbt dor en Barg Ideen... Aver so konkret nix." Dor mutt mehr kamen.

Ik heff mi al länger en beten mit dat Thema 'Feernsehn in
Minnerheitenspraken' beschäftigt. Al de wichtigen Minnerheiten hebbt al
jemehr egen Feernsehn. Euskal Telebista för de Basken, Omrop Fryslân för de
Fresen, Televisió de Catalunya för de Katalanen, Maori Television för de
Maori, Sianel Pedwar Cymru för de Walisen, Teilifís na Gaeilge för de Iren
un noch mehr annere. Bi en Ümfraag 1998 is rutkamen, dat de Lüüd Feernsehn
un School för de beiden Saken hollen doot, de de Spraak opmehrst beinflussen
doot. (De süüddüütsche Samstag, de bi de jungen Lüüd dat noorddüütsche
Sonnabend verdrängt hett, is ok ut dat Feernsehn rutkrapen.) Feernsehn in
Minnerheitenspraken is en groten Bidrag, de Spraak bewohren to helpen. Ahn
Feernsehn un Medienpräsenz _kann_ en Spraak gornich op Duur bestahn blieven,
nich in uns Medientietöller.

Dorvun heff ik mi en beten Gedanken maakt. Un welk vun disse Gedanken
opschreven. Dat steiht nu allen ünner
<http://marcusbuck.org/nds.tv/><http://marcusbuck.org/nds.tv/>.
Mien Gedanken to en plattdüütschen Feernseh-Senner. Döfft heff ik em *nds
Feernseen.* 'Keen also Intress an dat Thema hett, schall sik mien Notizen
mal ankieken. Un geern ok Kritik geven. Wenn dat wesen mutt, ok harte Kritik
;-) Un wenn mi een, de en beten bodenstänniger is, geern op'n harten Boden
vun de Realität trüchhalen will (*dat kann un kann nix warrn*), denn schall
he mi sien Verscheel ok geern seggen.

Un wenn de Kritik hier nich to vernichtend utfallt, denn will ik mit de Idee
villicht ok hausieren gahn...

Velen Dank, dat ji dit leest hebbt
Marcus Buck

----------

From: Marcus Buck <list at marcusbuck.org>
Subject: Language politics

> Dat steiht nu allen ünner <http://marcusbuck.org/nds.tv/>.
Dat is öbrigens en Wiki. 'Keen also wat dorto seggen will oder wat
utbetern, kann dat geern doon un is dorto ok explizit inlaadt!

Marcus Buck
-------------- next part --------------
An HTML attachment was scrubbed...
URL: <http://listserv.linguistlist.org/pipermail/lowlands-l/attachments/20071002/7c5c4cd4/attachment.htm>