LL-L "Language promotion" 2009.12.27 (05) [NDS]

[Lowlands-L List]

===========================================
L O W L A N D S - L - 27 December 2009 - Volume 05
lowlands.list at gmail.com - http://lowlands-l.net/
Encoding: Unicode (UTF-08)
Language Codes: lowlands-l.net/codes.php
===========================================

From: M.-L. Lessing <marless at gmx.de>
Subject: LL-L "Language promotion" 2009.12.27 (03) [DE-NDS]

Leev Hanning, leven Lü,

wi wüllt all de Sprook wohren, dat schulln wi eerstmal fasthollen. Wi wüllt
ehr ok utbreden, denk ik; wi all wüllt, dat mehr un jüngere Snackers en
godes Platt beherrscht un Togang to mehr pd. Informaschonen hebbt, wieldess
de regionale un veelfältige Charakter vun Platt wohrt blifft. So wied sünd
wi övereen? Good. Wat wi för de Spraak doon köönt un wüllt, schull good
dördacht ween. Dat schulln wi denn best hier tosamen maken. Du, Hanning,
betonst, dat de Spraak al so veel överstahn hett un wiss noch mehr
överstahn warrt ("*de Fahn weiht all oewer duusend Johr, *un sei weiht noch,
noch, un sei ward weihn!"). Marcus meent op de anner Siet, de Kulturverlust
hett hüüt ganz anner Tempo opnahmen, un veel davun warrt de Spraak nich mehr
överstahn, ehrdat se ünnergeiht (wenn ok mit weihen Fahn :-)). Dorwegen will
Marcus opleevst mit en "grotes" Medium as'n Kiekschapp-Senner Platt präsent
maken. Du, Hanne, wohrschuugst, de Spraak nu "'n Hittkopp mit
"Schnell-Rezeptur" (womoeglich mit'n flinken raschen Kakpott) up niemodsch'
Oort mit Dunner un Blitz ünner de Lüüd to bringen." Du meenst, wenn ik Di
recht verstah, de Idee (den Droom, dat Wulkenslott...) vun en
Kiekschappkanaal orr (vöreerst) en Webstee, 'neem Platt in multimediale Wies
ünner de Lü bröcht warrt. Richtig? As ik Marcus verstah, hett he da nix
Överflächlichs plaant, keen Schund; he will veelmehr weertvulle un ganz
normale Informaschonen in Platt faten. So as dat mit Hoochdüütsch ok
passeert. Richtig, Marcus? Man Du, Hanne, wohrschuugst, un dat maakt mi
nadenkern. Du hest veel Künn vun de pd. Konsumentenschap un ok vun pd.
Medienarbeit, un mi dücht, Du kunnst de Lowlanners nauer seggen, wat Du för
Probleme förchten deist.

1. Wat nau is de "niemoodsch Aart", de wi meiden mööt? Internet un TV wiss
nich, de gifft dat ja al, un Du steihst dor achter, dat weet wi.
2. Wenn de Spraak al so veel verkraft hett, as Du seggst ("*de Fahn weiht
all oewer duusend Johr, *un sei weiht noch, noch, un sei ward weihn!"), woso
schull se jüst an en Vörhebben as dat vun Marcus Schaden nehmen? Welk borgen
Gefohr sühst Du?
3. Du seggst: "Grote Schräd könn' noedige Epochen/Phasen in 'n Dutt maken",
un dat maakt hellhöörn. Welk Phasen meenst Du? Fehlt Platt en
"Entwicklungsphase", ehrdat dat riep is för sowat as Feernsehn? Meenst Du,
dat de Spraak to ooltmoodsch is un moderniseert höört? Orr is de
Konsumentenschap nich praat daför? Slah doch mal vör, welk Schreed een
toeerst doon schull, dat so'n Projekt as Marcus sien Spood hebben kunn!
Woans wöörst Du de Saak anpacken?

Blangenbi hest Du ganz recht, Hanne, wenn Du mi wohrschuugst, mi nich to
övernehmen. Jümmers, wenn mi en Ünnerfangen good schient, bün ik as eerst
dorbi, min Mitdoon in'n Ring to smieten, wieldat dat de beste Aart is, en
Saak to feddern; man dat heff ik nu al bi so mennig Saken daan, dat meist
nix mehr nablifft vun mi, un ik weet, dat ik an min Grenz kamen bün. Maak Di
keen Sorg, ik övernehm mi nich.

Hartlich

Marlou

P.S. Mailst mi mal Din nieges Gedicht över'n Klimawannel?

----------

From: Marcus Buck <list at marcusbuck.org>
 Subject: LL-L "Language promotion" 2009.12.27 (03) [DE-NDS]

From: Hannelore Hinz  <HanneHinz at t-online.de <mailto:HanneHinz at t-online.de>
>

> Subject: LL-L "Language promotion" 2009.12.26 (05) [DE-NDS]
>  Hallo leiwe Marcus un all' Lowlanners,
>  *de Fahn weiht all oewer duusend Johr,*
>
Richtig.

> * *un sei weiht noch, noch,
>
Richtig.

> un sei ward weihn!
>
Hm.
Vör hunnert Johr weren dat noch so bi 20 Millionen Minschen Plattsnackers,
von de de grote Deel ok den ganzen Dag Platt snackt hebbt. Vondaag sünd noch
so bi 5 Millionen nableven. Dor sünd al de mittellt, de blot "Hoochdüütsch
op plattdüütschen Luudstand" snackt (un ok "Nedderlandsch op Nedersaksischen
Luudstand") un ok de, de man af un to Platt snackt. Un von disse 5 Millionen
staht bestimmt mehr as 4 Millionen al in't twete Halv von't Leven. Dood is
de Spraak noch lang nich, dat stimmt. Ik bün aver meist vermoden, dat de
Fahn in Tokumst blot noch labbig üm de Fahnenstang slackert. Stüttig in'n
Wind knattern schall se woll nich mehr. Nich ahn frischen Wind...

  Du hest di nu inreiht, dat finn ick grotorrig, hest all 'n Kumpelment
> verdeint, denn jung' Lüüd bruken wi, wenn't güng bannig väl, de eins as uns'
> Nahkamen dorför sorgen, dat de Wind ut all' Richtungen uns' Fahn lustig
> fladdern lött.
> Man, du steihst an'n Anfang, uns' Spraak nich. Dat möten respektieren, sick
> mit de Spraak vertruugt maken, all' ehrn Riekdaum annähmen un begriepen un
> ok ehr männig Up un Dal, un för ehr Bestahn un Wiererkamen instahn. Grote
> Dichters , Künstler un anner  einfache Lüüd ut verleden Tieden, de wi binah
> all vergäten hebben un väl leiwe Minschen (ok hütigendaags) ehr Gäben,
> männigmal mit Hartblaut, dat möten wi achten.
> Hefft ji dat bether all mitkrägen. Dor möten männigmal ahn Komputer-Technik
>  Literatur
> ok von dunnmals läsen.
> Uns' Spraak is nich krank, sei is all lang' ut de Winneln rut un hett sick
> grot rutreckt.
> Fählers liggen mihr an'n Ümgang un mit ehr Snacken un womoeglich an de
> Makers.
> Sei hett, na ja, segg ick mal "ehr Krise" (nich so leeg as de Klimawannel,
> Wärerwannel), un wenn in so ein Tied noch all'n up'n Kopp stellt ward. wat
> sall dor bi rutkamen, dennkann't blot leeger kamen. Uns' Spraak is kein
> "Gegenstand", sei is "Uns' Mudderspraak", jawoll Mudder un Spraak, de will
> man nu so so dägt, 'n Hittkopp mit "Schnell-Rezeptur" (womoeglich mit'n
> flinken raschen Kakpott) up niemodsch' Oort mit Dunner un Blitz ünner de
> Lüüd bringen. Grote Schräd könn' noedige Epochen/Phasen in 'n Dutt maken.
> Uns' Spraak  paßt nich in ein "Labor". Wat bether löp is gaud lopen, dat
> verdanken wi väl väl väl Minschen hier un wietaf, ok unsen LL-L Baas,
> jawoll!
> Hest du di mal utkundschaft, wat Minschen nah ehren Arbeitsdag för uns
> Platt makt hebben un ümmer wedder "ehrenamtlich" mit bi sünd. Kiek di mal
> üm, dat is as in einen Immenrump, wo sick wohrhaftig wat deit.
>
"ehrenamtlich" is dat Problem. Dat reckt nich. Weertschop drifft uns Welt
an. Dat gifft noog Lüüd, de kannst du dusend Maal de Schöönheit von de
Spraak wiesen un se intresseert sik dor nich för. Aver wenn se dor Euros mit
maken köönt, denn kummt dat Intress! Dat mutt mööglich wesen mit
Plattdüütsch Geld to maken.
Düütschland gifft 2009 97,9 Milliarden Euro för Bildung ut. Wenn dor man 1%
von för Plattdüütsch utgeven warrn dee (de Andeel von de Platdüütschen an de
Bevölkerung liggt bi 5%, fröher wohrschienlich över 30%), denn dee de
plattdüütsche Kultur exploderen!
De Staat hett in de Vergangenheit Billionen utgeven för en System, dat dor
op utricht weer oder dat tominnst ahn mit de Wimper to tucken tolaten hett,
dat Plattdüütsch bilütten utstarvt.
Dat Recht op Moderspraak is en Minschenrecht. Un dit Minschenrecht hebbt de
Bundsrepubliek Düütschland un dat Königriek Nedderland för dat Plattdüütsche
ok goodkennt. Theoretisch hebbt de Plattdüütschen en Anspruch dor op, dat in
Plattdüütsch vergliekbor veel investeert warrt, as in Hoochdüütsch un in all
de annern Spraken von Düütschland (de aver jüstso slecht dorstaht as
Plattdüütsch). Wo liggt dat an, dat wi dor Lichtjohren wied von af sünd? Dat
liggt alleen dor an, dat nüms dat infeddert! Passeert ja nix, wenn de Staat
sik an sien Plichten nich höllt. Un de Staat gifft blot Geld, wenn he wat op
de Mütz kriggt, falls he dat nich gifft. Wenn de Plattdüütschen maal den
Staat op de Mütz haut, denn kunnen se ok Geld kriegen. Se müssen em aver
önnig op de Mütz geven, dat he dat ok markt. Demos un sowat.

Wenn wi sowat harrn as de Okzitaniers mit Anaram Au Patac, denn dee dat al
veel helpen. Ehrenamtliche Kulturarbeit is good, aver ahn Aktivismus helpt
de Hobbyismus nich veel.

Marcus Buck

•

==============================END===================================

 * Please submit postings to lowlands-l at listserv.linguistlist.org.

 * Postings will be displayed unedited in digest form.

 * Please display only the relevant parts of quotes in your replies.

 * Commands for automated functions (including "signoff lowlands-l")

   are to be sent to listserv at listserv.linguistlist.org or at

   http://linguistlist.org/subscribing/sub-lowlands-l.html.

*********************************************************************
-------------- next part --------------
An HTML attachment was scrubbed...
URL: <http://listserv.linguistlist.org/pipermail/lowlands-l/attachments/20091227/30ad7e3a/attachment.htm>