LL-L "Names" 2007.06.13 (01) [LS]

[Lowlands-L List]

L O W L A N D S - L  -  13 June 2007 - Volume 01

=========================================================================

From: jonny <jonny.meibohm at arcor.de>
Subject: LL-L "Names" 2007.06.12 (01) [LS]

Beste Utz, Marcus, Heiko un Ron,

dat Jii de plattdüütschen Ourtsnomen nu üm jeyden Priis, woll as
Fanal, hebben wöllt, weyr mii kloor.

Man, sou eynfach 'n tweyden Nomen (no Moyglichkeyt ouk noch no Sass!!) opp
'n Schild klayen- dat kann ne veel helpen. Loot' mii mii mol in uns Rebeyt
ümkieken.

Dat Dörp, wo ick herkomen douh, heyt 'Balje'. De Oul'n hebbt door in miin
Kinner-Tiid noch opp Nedderdüütsch 'Baal(-d-)sche' (van dat ourspröngliche
'Balghe/Balga'?) tou seggt. Weyt blout noch 'n Handvull Lüüd. Mii dücht, dat
day woll Piin moken, dat vandoog sou to benomen, un de Börgers day'n dat ouk
ne woll'n.

'Cadenberge' heyt innen Volksmund 'Codendutt[-el]'- oha, hebbt de
Nober-Dörpen ennig wat tou smustern!

'Oberndorf (Oste)' heyt in uns Platt 'Oubern-*dörp*' mit Betonen opp de
tweyde Silbe. Woans wöllt Jii dat opp 't Ourtsschild kriigen? In Phonetics?
Dat sülbige mit 'Balksee' >> 'Balk-*seì*'.

'Otterndorf' heyt 'Ooterndörp' mit eyn langet _o_ voyrn un Stress op de *
eyrste* Silbe...

'Geversdorf' is 'Geibersdörp' (froyher: 'Geuensthorpe')- or is dat meyhr
'Geybersdörp'?

(Heiko: Du süchst woll, wat hier nümms helpen kann, de nich uut de Regioon
koomt!?)

'Wingst' is de öllste Ourtschapp hier un hett schiints keyn' plattdüütschen
Nomen! Jüst sou 'Dingwörden'- door eyn 'Dingwöör'n' van tou moken, weyr keyn
Verbeetern. Jüst sou 'Freiburg/Elbe': 'Fryborgh' hebbt's touletzt in 't 15.
eeuw seggt.

Un wat mookt wii mit dey Dörpen, de gor keyn *houghdüütschen* Nomen hebbt?
Stigmatiseert wii jem edders geevt wii jem welk? 'Düdenbüttel' waard tou
'Dude's(!) Bezirk', 'Isensee' tou 'Eisensee', 'Laack' tou 'Pfütze', 'Hörne'
tou 'Ecke', 'Oederquart' tou 'Oderiks Warft', 'Wischhafen' tou
'Wiesenhafen' usw.? *Gleiches Recht für alle!?* Nu fangt ne dat Lachen an-
dat kunn ouk Sinn mooken, foyr 95% van de Inwohners, de vandoog keyn Platt
meyhr snackt, de Ourspröng, Herkomst van de Nomens tou verkloor'n un
bewoor'n.

Nee- door opp eyn greesig't geelet Verkehrs-Schild eyn, twey Boukstoben tou
ännern, wat dat ennig 'platt' utsücht, dat kann 't doch woll ne ween. Is mii
tou simpel, uut 'Neuenkirchen' 'Neyenkarken' tou mooken, 'Neuhaus' tou
'Neihuus', 'Eierdorf' tou 'Eierdörp'. Tou dicht an Patentplatt; door köönt
wii keyn' Heyr'n van dennen Teller mit sleepen, opp disse Wiis rett' wii
uns Sprook 'wiss ne.

Man- wat ick mii goud vöörstell'n kunn, weyr 'n tousätzlich't Schild, sou,
as de Amis dat hebbt; van mii uut ouk 'sau-preußisch' genormt.
Door kannst' 'n Bült meyhr 'roppschriiben, al de oul'n Nomen, Gründungsjoor
un' un'... Dat kunnen de Gemeenten nu', opp Stünns all mooken; door bruukt's
keyn Verloyv van jichenswelk' Bürokraaten tou. Al de dusselige Jammerey no
de Oubrigkeyt is doch Naar'nkroom un' typisch Spießer-Düütsch. *"Wo ein
Wille ist, da ist auch ein Weg!"* Man- an dennen Will'n gloyv 'ck ne meyhr
recht in uns' 'Wohlfahrts-Sellschopp'. Wenn 'ck Heiko recht begreepen hebb,
denn kreiht de Lüü' nu jo all no de Fehr's Gülden üm Hölp. Is dat nich 'n
Bewiis, wat se de neddersassischen Nomen van jem ehr Dörpen all nich meyhr
weyt edders wat dat amend goorkeyn geben hett? Un nu *mutt*'n plattdüütsch'
Wourd her; hett de Minister jo seggt... Lachnummer, zum Kugeln!

(BTW: Utz- dennen 'Jan' uut 'n Oul'n Lannen kennt wii hier ne sou goud; uns
'Johannes' heyt 'Jonny' edders 'Jehann' ;-).)

Allerbest!

Jonny Meibohm
-------------- next part --------------
An HTML attachment was scrubbed...
URL: <http://listserv.linguistlist.org/pipermail/lowlands-l/attachments/20070613/6f3ed5ec/attachment.htm>