LL-L "Language planning" 2009.06.21 (03) [NDS]

[Lowlands-L List]

===========================================
L O W L A N D S - L - 21 June 2009 - Volume 03
Encoding: Unicode (UTF-08)
Language Codes: lowlands-l.net/codes.php
===========================================

From: Hannelore Hinz  <HanneHinz at t-online.de|>
Subject: LL-L "Language planning" 2009.06.20 (01) [NDS]


Leiw' Frünn',

ob mien Gedanken hier so rinpassen, weit ick nich so recht, oewer Ron kriggt
dat all hen.

Wecker kennt noch Gerd Lüpke (ein Perfesser mit hoge Verdeinsten). Ein deipe
Fründschaft mit dat Schriewer-Poor Gerd un Irmgard (Greif-Lüpke) höllt ümmer
noch; nu mit sien Wittfru.

Wat de Grammatik angeiht, later noch nahdenkern Wüür.

G. Lüpke  ut Varel schrew 6. Mai 2000 an mi (Strämel ut dissen Breif):

Un kümmt noch tau, dat ick giern an Di schrieben dau.
Nu över tau Dienen Breif. Inga is stolt as son Hahn - nee, as son Kluck up'n
Meß, indäm ehr Geschicht Di so gaud geföllt un Du Di dor so väl Gedanken üm
makt hest:
Ick mein, Du hest dat bäten tau dull mit de klauken Vörschriften, Hanning.
Wossidlo hett ganz, ganz grote Verdeinsten, dat is klor, öwer'n Minsch wier
he ok man. Vörschriften wat de Formen angeiht, sünd nödig un könen Holt
gäben. Öwer de Gedichten maken wi! Wi un nich de klauken Theoretiker. Un
wenn wi de Formen kennen un meinen, wi müßten dor öwer weg - wägen de Saak,
wägen dat Gedicht un dat, wat dat seggen will un sall - denn hebben wi dat
Recht, uns dor ok öwer wegtausetten. Dichtung läwt - öwer Formen sünd man
dat Skelett - un dat kannst bögen. Öwer wenn Dichtung läben sall, denn möt
Fleisch un Blaut up dat Skelett. Un dat kümmt nu mal von uns. Ick weit, dat
willen väle von de klauken Akkemickers nicht weiten - öwer dat sünd denn ja
ok man blot de Eunuchen, de woll weiten, woans dat makt warden möt, de dat
öwer sülben nich könen. So väl tau de Theorie.
Ick pack Di mien Basha-Essay mit in. Denn ja ok noch mal mien eigen Haiku
"Lotos und Weidenbaum" tau'n Ankieken, wenn Di ok de intressieren daun. Möst
denn man seggen. (Ende)

Wi hebben jeden Sünndag per Quasselstripp vertellt. As wi up de Grammatik
tau snacken kämen, säd hei: Hanning, mak dat nich tau dull mit de Grammatik,
mit ehr maken wi uns Sprak  kaputt.

Un dor is väl an wohr. Bi mien' Vörgänger (ein hd. un nd. Schriftsteller)
sünd de "Erwachsenen", Lehrer, Ärzte, Hausfrauen usw. usw. nah ein Semester
nich wedderkamen. Sei harden de Näs' vull, ja, sei sünd weglopen 1977/78.
Denn hett de Direkter von de VHS (feinen Kierl) so lang mit mi rümmegummelt
(gebettelt), un ick säd tau. Un woans ick de Saak angahn bün, dat is ein
anner Geschicht.

Ick heff 27 Johr (nebenberuflich) un nu noch 3 Johr (ut Freud) mit de
Mitmakers wierermakt, un so sall dat blieben. Probleme, wat de Grammatik
angüng, man blotsen
bi de Konjugation Präsens as Bispill: ick gah, du geihst, hei sei dat (et)
geiht, wi gahn (so heit dat hier), ji gaht, sei gahn. Fief bet teihn Minuten
un nich länger... süss...oha.
Un wenn wi Reuter, Brinckman, Groth, Bellmann, ok R. Hahn lääst hebben,
also mit de Klür von ehr Platt, denn hett dat ofteins heiten "...  bi uns
Tauhuus seggen wi dat ganz anners", un dat möten annähmen un jeder hett't
veertellt. Ick wull man seggen, wer uns' Spraak snackt, de kann ok de Klür
von anner pd. Spraken bestens verstahn. Dor möten wi gor nich soväl Ümstänn'
mit maken, dat fäuhlt man doch gliek.

In de iersten Johrn bi de VHS haar ick so an 25 Mitmakers
(Fortgeschrittene), un  bi de
Anfänger binah so väl. Heff je noch all' de Listen un Lihrprogramme, man de
müßt ick ok noch utklamüsern, wiel 't hier noch kein gäw. Un ahn  PC, man
blot mit ein klapperig Schriewmeschin, wat'n hüt nich mir glöwen will usw..
Un denn gew't nich dat "Durchschlagpapier", wat hetten sick dunnmals afquäln
möten.
(Un denn noch de Bang vör gewisse Aportendräger.)

Dit is nu mien Wuurt taun Sünndag.
Wi möten mihr an dat Bestahn von uns' Spraak denken.

Von Harten mien Gräuten.

•

==============================END===================================

 * Please submit postings to lowlands-l at listserv.linguistlist.org.

 * Postings will be displayed unedited in digest form.

 * Please display only the relevant parts of quotes in your replies.

 * Commands for automated functions (including "signoff lowlands-l")

   are to be sent to listserv at listserv.linguistlist.org or at

   http://linguistlist.org/subscribing/sub-lowlands-l.html.

*********************************************************************
-------------- next part --------------
An HTML attachment was scrubbed...
URL: <http://listserv.linguistlist.org/pipermail/lowlands-l/attachments/20090621/9d1eb60b/attachment.htm>